الانتخابات المصرية والاستقطاب الديني

هو ايه اللي بيحصل في الانتخابات وليه فوز الحرية والعدالة يليهم النور يليهم الكتلة المصرية ؟ وليه ما فازش اي حزب شبابي ؟؟اولا لازم نعترف بان اكتساح الحرية والعدالة الفصيل السياسي لجماعة الاخوان المسلمين مش مفاجأة للي عارف الاخوان مش اللي سمع عنهم (والفرق كبير)॥ فصيل سياسي بقاله 80 سنة في مصر منظم وله اهداف ومباديء .. خاض انتخابات برلمانية في عهد مبارك كتيروخسروا بالتزوير كتير واتسجنوا كتير وعارفين كويس ازاي يحطوا برنامج انتخابي وازاي يعملوا دعاية انتخابية ناجحة لهم وازاي يوصلوا لجمهور الشارع مش جمهور الفيس بوك وتويتر .. فطبيعي انهم يكتسحوا

اما بخصوص النور والكتلة المصرية ولا ابرأ الحرية والعدالة من نفس الاتهام .. لازم نعترف ان حصل استقطاب ديني .. يعني ايه ؟يعني مثلا مرشح حزب النور يحط صورة الشيخ محمد حسان علي بانر حملته الانتخابية
او ان المرشح يقول انتخبوني من اجل اعلاء كلمة الله ومن اجل العمل بشرع الله
ولما يحب يهاجم مرشح خصمه يقول ده مدعوم من الكنيسة
كل ده اسمه استجداء ديني .. اذا عجزت ان تقنع منتخبيك ببرنامجك الانتخابي وبشخصك فماتتمسحش بالدين وتقول انتخبوني علشان الاسلام .
علي الطرف التاني الكنيسة ما سكتتش وراحت منزلة قوايم الكنيسة .. ومحددة لكل دايرة تنتخب قايمة الكتلة المصرية واعوانها ومحددلهم كمان واحد فئات وواحد عمال وديه الاجابة النموذجية في الانتخابات المصرية برعاية الكنيسة
هتقولي الكلام ده كذب وماحصلش ॥ هقولك بوجود قوايم الكنيسة ومش هنشرها علشان ما اروجش لها و بشهادة عدد كبير من لجان الفرز ان في تلازم وتكرار لاسماء معينه ده يقول ان حصل توجيه واستقطاب للشعب
الكلام ده لا يجوز ومايصحش واستغلال لعقول الشعب وسواء مرشح اسلامي استجدي الدين او كنيسة دعمت مرشيحها بقوايم ده غش وخداع وتسببتوا في هضم حقوق احزاب الشباب والشباب المستقلين وغيبتوا وحجبتوا ارادة الشعب ولوثتوا نزاهة الانتخابات وقيدتوا حريتها

طيب حتى لو ماحصلش كل ده احنا استقطبنا بعض لااراديا هقولك ازاي ؟
لما يطلع ممثل لحزب اسلامي في التلفزيون ونظرا لان اعلامنا ذكي وواعي وبيفهم وتلاقي كل الاسئلة عن السلوكيات والملابس والخمور .. وكأن المرشح ده دوره في الحياة انه جاي يربينا ويقوَم سلوكياتنا الغلط .. والمرشح لانه مش ذكي سياسيا فيقوم يدب ويقولك همنع وهمنع وهمنع .. طيب هو مفيش حاجة اسمها برنامج انتخابي ؟ محاسبة الفاسدين ؟ محاسبة الناس اللي قتلوا الثوار ؟ الفلوس اللي اتهربت بره مصر ؟ مشاكل البلد اعادة هيكلة الشرطة والامن ؟ البطالة والعنوسة ؟؟ هو احنا كل مشاكلنا اللبس القصير والخمور والقمار والبوي فريند اخرج معاه ولا لأ !!

علي الجهة التانية الليبراليين اساءوا لنفسهم هم كمان .. وكل شوية يطلع واحد منهم ملحد ولا واحدة تقلع ملط وتقولك حرية .. ضاربين بثقافة المجتمع وعاداته و مباديء الاغلبية المسلمة عرض الحائط .. وكأنهم بيقولوا للشعب ليبرالي مرادفها ملحد عربيد .. ولا ساويرس الراعي الرسمي للكتلة المصرية ده بقي راح كندا وسجل مع مذيعه فيديو لطيف جدا بيستنجد بالغرب من زحف الاسلاميين وبيقولهم احنا في معركة غير متكافئة و تدخلوا و اوقفوا الدعم الخارجي للاسلاميين او ادعمونا بس في السر (اوعى حد يقول لحد ها)

وكله كوم والمادة التانية من الدستور كوم - الاسلاميين مصرين علي المادة التانية والليبراليين مش عايزينها وان اخفوا ذلك
كل ده خلق نوع من الفوبيا !!المسلم حتي لو مش متدين حتي لو مش بيادي فروض دينه لكن هو خايف ان لو الليبرالين مسكوا البلد هيلاقي الناس في الشارع ماشية ملط ده ضد عقيدته حتي لو هو شخصيا مقصر في دينه .. وكله الا المادة التانية حتى لو مايعرفش ديه بتقول ايه .. فانتخب حزب اسلامي
والليبراليين والمسيحيين وكل الاقليات خافت من تصريحات التيارات الاسلامية انهم هيشددوا عليهم و هيضطهدوهم اكتر وهيخنقوا عليهم في اللبس و الخمور و تولي مناصب الدولة العليا فبقي يصوت لتيار ليبرالي حتي لو مايعرفش برنامجه الانتخابي ايه


يا اسلامي هل سألت نفسك يعني ايه ليبرالية ؟ مبادئهم ايه ؟ هنطبق ليبرالية اوروبية ولا ليبرالية ممصرة ؟
يا ليبرالي انت تعرف ايه عن الاخوان ولا السلفيين ؟ قريت لهم حاجة ؟ تناقشت مع واحد فيهم ؟ قريت لحسن البنا ؟ قريت عن الفتح الاسلامي لمصر ؟ شوفت عمرو بن العاص لما دخل مصر عامل اهلها ازاي ؟ واقباط مصر استقبلوه ازاي ؟ عمرو بن العاص حكم مصر تلات سنين ما سألتش نفسك هو ساب اثار الفراعنه وماكسرهومش وقال ديه اصنام ليه ؟
يا اعلاميين مصر: امتي هتقدموا اعلام احترافي حيادي ؟ وامتي هتنحوا مصالحكم الشخصية وارائكم ومخاوفكم ؟ امتي هنشوف اعلام محترم هادف بيناقش فكر بموضوعية من غير زيف وصور تعبيرية ؟؟

احنا ليه كل ثقافتنا ثقافة فيسبوكية مشوهة بفعل شخصيات مريضة نفسيا او عميلة بتنقلك جزء من الحقيقة مش الحقيقة الكاملة ومش بتديك الفرصة انك تكون فكر مستقل اصلا ولكن فكر تبعي تابع للي نقلك المعلومة بالشكل اللي عايز يوريهولك بيه

الليبرالية مش وحشة اوي كدا ولا الفكر السياسي الاسلامي وحش .

كفاية الخوف والهلع وانعدام الثقة ده اللي مش مبنيه علي اساس اصلا .. اكاد اجزم ان ولا واحد من المنتخبين قرأ البرنامج الانتخابي للحزب اللي رشحه .. و راح انتخب بالسمع وتحت تاثير الخوف من الاخر و الخوف علي المادة التانية والخوف من الغرامة .. تعالوا نثق في بعض ونخطو اول خطوات الديموقراطية ومانسفهش من اراء بعض احنا سواسية ومن حق كل واحد يبدي رأيه ولا يجوز لنا الاعتراض علي راي الاغلبية او تغليب اراءنا الشخصية بحجة ان الباقي مش فاهمين هي ديه الديكتاتورية اللي اتربينا عليها .. فعايزين نتعلم الديموقراطية واي كان البرلمان الجاي هنشوف ادائه وهنحاسب اعضاءه و هنعترض لو ما اعجبناش احنا بنختلف مع سياسي مش بنختلف مع رجل دين .. ولو التجربة فشلت يبقي ما نكررش الغلط في البرلمان اللي بعده وكل برلمان وانتم طيبيين .