عجائب وغرائب الفيس بوك

بعد المقدمة التى لا داعي منها علي الاطلاق .. وبما اني من مستخدمي الفيس بوك الصامتين .. فمش ورانا حاجة نعملها غير القراية والتأمل والتفكر في خلق الله المبعترين علي النت .. وربنا ينتقم منه مخترع الفيس بوك فتح هومات الناس علي بعض والتيكر والتايم لاين ماخلاش حد مستور .. فاحب اتكلم عن بعض الظواهر الفيسبوكية اللي مالهاش اي علاقة ببعض  واللي بتضايق امثالي من الصامتين.

الظاهرة الاولي : ان بعض مستخدمي الفيس انصهروا وامتزجوا بصفحة الفيس واختلط عندهم العام بالخاص .. فتلاقي واحد كاتب ستيتس انا رايح اعمل بي بي و اللي بيعطس واللي بيكح واللي بيهرش في قفاه وما الدنيا الا دبليو سي كبير ولازم تشارك الفريند بتاعك في اسهاله وامساكه قصدي احزانه وافراحه.. و لا تلاقي واحدة متجوزة حديثا فتكتب استيتس انها راحت عند حماتها واكلت بطيخ بالشمام ومهلبية بالارانب واتمرجحت ع المرجيحة واتعورت في صوباع رجلها الصغنن وجوزها غنالها بوس الواوا .. مع ان اكاونتات الناس ديه عامة مش برايفت ولا للاصدقاء المقربين فقط .

الظاهرة التانية : وهي نوعية محيراها الريلاشين شيب .. وكل شوية يترنحوا بين سينجل وخاطب / مخطوبة .. وده عادي مفيهوش مشاكل نعتبره اشهار .. الا انه في حالة خطوبتهم تلاقيه / ـها  بيحطوا صور مع خطيبته / ـها .. وستيتس نارية وكلمات عشق وغرام من بتوع قناوي وهنومة .. المشكلة انهم بيفسخوا خطوبتهم وترجع الحالة سينجل تاني وتتمسح الصور .. وتنهال علينا الاستيتس الغامقة اللي تجيب اكتئاب ويعملوا كمون نوعي مش مغلي .. واذ فجأة الحالة تتغير لخاطب/ مخطوبة وتتحط صور جديدة مع اشخاص جديدة وستيتس غرامية نارية تاني .. علي فكرة شكلكم بيبقي وحش اوي ادام البشر اللي انتم اقحمتوهم في حياتكم الخاصة.

الظاهرة الثالثة : ودول غالبا رجالة او ولاد - ان صح التعبير- تلاقيهم منكبين علي صورة بنت ايه القمر ده ..  ايه العسل ده .. معقولة في جمال بالشكل ده .. وهم لو كلفوا نفسهم دقيقتين سيرش علي جوجل هيكتشفوا ان الصورة اللي بيشموا فيها ديه لممثلة مغمورة .. اكيد الناس ديه  بتشد كولة او بتشم صوابع رجليها استحالة تكون كدا خلقة ربنا يعني .. ولو كل مستخدم علي النت حط صورته الحقيقية ماحدش هيجرؤ يدوس علي لينك البروفايل..  هيبقي فيلم رعب جحيم تحت اللينك.

الظاهرة الرابعة : دول اول ما تفتح الشات تلاقيهم بيقولولك ممكن نتعرف .. واحب اسال اي واحد بيقول ممكن نتعرف .. هو ايه الفرق لما تطلب تتعرف علي النت وبين انك ترفع سماعه التليفون وتطلب رقم عشوائي فترد واحدة فتقولها ممكن نتعرف ؟ تقوم رزعاك قصيدة هجاء من بتوع جرير والفرزدق بس بالعامية .. ليه علي النت اسمه شات وعادي وليه علي التليفون اسمه معاكسة وقلة ادب ؟؟

الظاهرة الخامسة : وديه نسائية .. كل واحدة ربنا يكرمها وتعمل بيض اومليت .. صينية قلقاس بالباشميل ولا صوابع الست احسان تلاقيها مصورة الطبق وحطاه علي النت .. وشوفوا شطارتي شوفوا جمالي .. منه لله اللي دخل الموبايل ابو كاميرا البلد .

واخيرا اوجه رسالة لاصحاب القلوب الرحيمة  : "ارحموا من في النت يرحمكم من في السماء ".