هي وهو .. والجواز

هي كل ما الدنيا تعاكس معاها تقولك انا هتجوز واقعد في البيت .
هو كل ما الدنيا تضايقه يقولك فين الجرين كارد .. انا عايز اسافر .. اهاجر .. اسيبلكم البلد .
--------------
هي لما واحد يتقدملها بتتعامل مع الأمرعلى انه فيري كونفيدنشال  وطبعا قراية الفاتحة بتبقي توب سكريت وبتتنفذ ساعة الصفر في خندق تحت الأرض وماتعزمش فيها حد خصوصا صحباتها البنات و كل بنات عائلتها خوف من العين والحسد والأر لحسن المتعوس بتاعها يتخرم او يتحرق او تخبطه عربيه

هو عادي بيقول لاصحابه وقرايبه وماعندوش مانع يحضروا الخطوبة وقراية الفاتحة كمان

-----------

هي بمجرد ما تلبس الدبلة تتقمص دور جولم في سيد الخواتيم .. وتتبت علي هاير بريشسسس (الدبلة) وتقعد لحد ماتتجوز ماتستحماش لحد ما تعفن لكن ما تقلعهاش من ايدها ابدااااا لان نينه قالتلها ان قلع الدبلة فأل وحش

هو بيلبس الدبلة في فترة الخطوبة بس وبعد ما يتجوز بشهر بيقلعها ويرميها خالص.

-----------

هي أول ما تتخطب تغير الريلاشن شيب علي الفيس بوك وتقعد هي وصحباتها يباركوا ويهنوا بعض علي  النصر العظيم والفتح المبين والانجاز الرائع اللي حققته

هو بيخفي الريلاشن شيب خالص .. بيحب يعيش دور الرجل الغامض  يعني خاطب ومش خاطب .. متجوز ومش متجوز بيحب يسيب الباب موارب لصاحبة النصيب  .. ويا ويلكم بالحلوات .. والراجل قلبه كبير ويساع من الحبايب كتير

-----------

هي في كل كلامها مع صحباتها او قرايبها لازم تجيب سيرة المتعوس لأ هو أساسي الحوار عن المتعوس .. النقطة ديه مهمة ومحورية لانها بتعاني من انفصال شبكي حلزوني في الشخصية وماحدش بياخد باله .. فهي ففترة الخطوبة بيبقي كل همها تتباهي بوسامته وشياكته ورقته وشقته وعربيته والبوزينشن الفظيع والأكسون الشنيع بتاعته والأغ ياي علي الأغ بتاعته .. بعد ما تتجوز يتحول الحوار لأد ايه هو أناني ومغرور وماعندوش ذوق وماعندوش دم وماعندوش وماعندوش وماعندوش ...

هو مابيجبش سيرتها خالص لا قبل ولا بعد .. هي ملكية خاصة مايحبش حد يجيب سيرتها غيره في حديثه الخاص مع ربه (بالخير) طبعااا.

-----------

هي بعد ما تتجوز وتجيب طفلول كدا صغير .. تعيش دور قارون لما قال (إنما أوتيته عن علم عندي) .. وتبتدي تعيش دور حكيم الزمان علي صحباتها اللي لسه ما اتجوزوش وتنصحهم بالاهتمام بشكلهم زيها كدا وان يبقي لسانهم حلو زيها كدا ودمهم خفيف وزي السكر زيها كدا .. لانها شخصية توووحفة وحلوة وزي القمر و(الأملة) اللي هي فيها ديه لان مفيش واحدة زيها كدا أصلا خالص

هو بعد ما يتجوز يبتدي يعيش دور الواعظ برضو علي اصحابه ويوضحلهم اد ايه قرار الجواز ده كان غلطةةةةةةة وندمان عليها.

 -----------
اضافة صديق المدونة : مؤنس فرحان
هي : اي عمل بتعمله في حياتها بيبقي الهدف منه تطلع بعريس , لو اتحجبت , اتنقبت , قلعت حجاب , راحت تشتغل , قعدت في البيت , اتكلمت في سياسة , شاركت في ثورة , راحت حفلة عيد ميلاد , خطوبة , جواز هي نازلة تصطاد عريس .. ولو ما طلعتش بعريس يبقي العمل ده مالوش اي لازمة وعلشان كدا ماتلاقيهاش فالحة في حاجة علشان صاحب بالين كداب
هو : حياته و وجوده وسر سعادته انه يبقي ناجح في عمله
------------

وفوتكم بعافية انا جاية اهدي النفوس ...