مبادرة عتق رقبة مبارك مقابل 100 مليار دولار

بما اني مواطنة مصرية لابويين مصريين .. وشربت من نيلها حتى تقيأت .. وجربت اغنيلها وفشلت .. ومشيت في حواريها وتوهت .. وعملت كل حاجة قالتها الست شيرين عبد الوهاب .. فمن حقي كمواطنة مصرية ان ادلو بدلوي في قضية القرن الا وهي محاكمة مبارك (بابانا) .. وان اتوجه بخطابي الي اخواني المصريين العقلاء والغير .. الشرفاء والغير .. الي كافة الشعب المصري باطيافه من عمال وفلاحين ( فكرتوني بخطاب مبارك الاول في احداث الثورة لما توجه بخطابه الي العمال والفلاحين ونسي طبقة المتعلمين .. غالبا اتبرى منا واكيد ندم انه علمنا .. اخس عليك يا بابانا .. اخس اخس)

اخواني المصريين دعونا نفكر بالعقل

لقد قتلنا مبارك طيلة 30 عاما قبل ان يقتل المتظاهرين ॥ كان هناك مايسمى بالطبقة المتوسطة فانقرضت .. اصبح هناك اغنياء غنى فاحش وفقراء فقر مدقع .. قتلنا بالمبيدات المسرطنة والهواء الملوث و الماء الاسن والاطعمه الفاسدة وانتشرت في اجسادنا امراض الكبد والكلى والسرطانات انتشار النار في الهشيم .. قتلنا بسكك الحديد الخربة وبالعبارات المنتهية الصلاحية .. قتلنا نفسيا ومعنويا واخلاقيا بالعنوسة والبطالة والمخدرات والاعلام المنحل اللاخلاقي .. تاخرنا تعليميا وثقافيا وعلميا ومهنيا واصبحنا مغيبين في اخر الركب بعد ان كنا دولة الفراعين .. استباح اراضى الوطن التى استشهد ابناءنا من اجل استردادها ووزعها على عصابته بالامر المباشر كما لو كانت عزبته .. تاجر بدماء 35 الف جندي مصري شاركوا في حرب الخليج مقابل شيك ب120 مليون دولار كعربون اول من الشبخ زايد .. باع الغاز المصري لألد اعدائنا بنصف ثمن تكلفته ارضاءا لامريكا والكيان الصهيوني ولمكاسب مالية لصديقه حسين سالم وقبض فيلات بشرم الشيخ عربون تواطئه علي خيانه الوطن وبخس موارده .. استولى على رصيد مصر من البلاتين بعد عام واحد من توليه السلطة واودع 19 طن بلاتين ببنك بسويسرا فوكل نفسه واصيا علي مصر واملاكها وكل اموالها وثرواتها تصب في خزانته .. استباح اموالنا وارضنا ومواردنا وارواحنا وكرامتنا التي صارت مهدرة داخل اقسام الشرطة ومقار امن الدولة وبالتبعيه خارج ارض الوطن فيقتل المصري ويجلد ويسحل بالخارج ولا تهتز شعرة لوزارة الخارجية او السفارات المصرية .. انه رئيس فاسد يستحق الاعدام والاعدام والاعدام الف مرة عن كل نفس ازهقت خلال عهده ..

لكن
هل سيعدم مبارك ؟؟؟ أم سيلقى مصير هشام طلعت مصطفى صاحب اشهر جناية قتل مصورة دامغة الدليل مكتملة الاركان ؟؟ ام سيكون اكثر حظا من هشام ؟؟

سيناريوهات المحاكمة المحتملة

- سيجري اسر الشهداء خلف مبارك سنوات وسنوات في المحاكم المصرية .. جرى المطلقة علي النفقة فالقضاء المصري حباله طووووووووويله.. يكون خلالها مات مبارك وشبع موت وسقطت القضية بانتقال الجاني للرفيق الاعلي.

- القاضي اكل تروشيبس وقرر يقول الحق ويصدر الحكم الذي يريح ضميره ويريح الشعب ويريح ارواح الشهداء في قبورهم وحكم بالاعدام !!! لكن وطبقا للمادة 17 من قانون العقوبات المصري فمبارك تجاوز الثمانين فيجوز للقاضي تخفيف الحكم درجة او درجتين .. فياخد مبارك مؤبد يقضيها في المستشفي معزز مكرم واحنا نسف تراب كالمعتاد .. او ان القاضي يحكم عليه 3-5 سنين كدا في اللذيذ يقضيهم في المستشفي ويخرج ياخد صن باث في شرم .

- بفضل فريد الديب محامي مبارك محامي الجواسيس والفنانيين واعقد القضايا المصرية الالتوائية و بفضل ولاء المجلس العسكري وطنطاوي صديق العائلة وضغوط بعض الدول الصديقة لمبارك الغير الصديقة للشعب المصري .. يحصل مبارك علي برااااااااااااااااءة ويعمل عملية استنساخ لنفسه و يحكم مصر 30 عام اعجف من سابقيهم وكل ما نسخة تموت يستنسخ نسخة جديدة الي ان يقرر الشعب الرحيل فيترك له الجمل بما حمل ولكن مبارك يأبي ذلك فيلملنا من الاراضي المجاورة لم ويقول هتروحوا مني فيييييييييييين

اذا لا يوجد اعدام ولا يوجد ما يشفي غليل اسر الشهداء ولا ما يريح ارواح الشهداء
فلما لا نتاجر براس مبارك كما تاجر بارواحنا (من شابه باباه فما ظلم مش كدا يا بابانا) ونعملها بجميله ونخلى سبيله مقابل 100 مليار دولار ( المبلغ قابل للزيادة حسب رغبات الشعب المصري) ويغادر ارض مصر واسرته الكريمة بلا عودة وامعانا منا في اظهار كرم الاخلاق سنوافق علي ان يدفن فيها (اظن عدانا العيب يا بابانا وبقت ارض المحيا والممات زي ما كنت عايز)

سيناريوهات عتق الرقبة

- ابناء مبارك هيعملوا جروب الريس محبوس وعايز فلوس اتبرع ولو بجنيه (زي ما شحتنا علشان نعالج غير القادرين هنشحت عليه علشان نطلعه .. اصيلة يا مصر)

- السعوديين والكوايته احباء مبارك هيلموا من بعض ويدفعوله الكفالة .. وفي المقابل هيوافق المصريين بان يسلموا مبارك للكوايته .. يسلقوه .. يخللوه .. يحكمهم .. يتصافوا مع بعض اصلهم شكله ويستاهلوه .. صبروا ونالوا والله

- مبارك هيقرر يفك الكيس ويطلع من تحت البلاطة ويدفع لنفسه .. بس ده منوفي ومايعملهاش .. هتلف سوزي تلمله اعانات وتبرعات ماهي تخصص تبرعات

احنا بقى طبقا للشريعه ندفع لاهالي الشهداء دية موتاهم والباقي وده كتير نصلح بيه مصر .. وده الهدف اللي علشانه ضحى الشهداء بنفسهم .. انهم يشوفوا مصر احلى واحسن لاولادهم باسقاط النظام وبالاصلاح السياسي والاقتصادي وده مش هيتم الا باستقرار البلد وفي وجود فلوس للاصلاح .

واخيرا ده مجرد رأي مواطنة مصرية من حقها تقول رأيها وان اختلف معها الاخرون